O meu setup de desenvolvemento en 2026
Un repaso rápido e honesto das ferramentas que uso para desenvolver, sen ligazóns de afiliados nin recomendacións forzadas. Só o que funciona.
3 min de lecturaGústame ver os setups doutros desenvolvedores. Non polo hardware—que tamén—senón por descubrir ferramentas ou fluxos que non coñecía. Así que aquí vai o meu, sen adornos.
O cerebro: UGREEN NAS
Todo corre nun NAS de UGREEN. Non é un servidor rack de empresa nin un PC gaming reconvertido—é unha caixa compacta, silenciosa e con dabonda potencia para o que necesito. Docker corre nativo e xestiono todo con docker compose.
Dentro hai de todo: Plex, AdGuard Home, Home Assistant, bases de datos para proxectos e os axentes de IA que uso para desenvolvemento. Cada servizo no seu contedor, cada contedor cos seus volumes. Cando algo se rompe, docker compose down && docker compose up -d e a outra cousa.
Editor: VS Code
Probei outros. Sempre volvo a VS Code. É rápido para o que pesa, as extensións son infinitas e o terminal integrado afórrame ter outra xanela aberta.
Extensións imprescindíbeis: ESLint, Prettier, GitLens e o tema Catppuccin Mocha porque programar ás 11 da noite cun tema claro é unha agresión visual.
Acceso remoto: Tailscale
Isto cambiou a miña forma de traballar. Tailscale crea unha VPN mesh entre todos os meus dispositivos—portátil, móbil, NAS—sen abrir portos, sen configurar nada raro. Estou nunha cafetaría e accedo aos meus servizos do NAS como se estivese na casa. SSH ao servidor, dashboard de Home Assistant, o que sexa.
Zero config, simplemente funciona. É desas ferramentas que unha vez que as probas non entendes como vivías sen elas.
Sistema operativo: Linux
O meu daily driver é Ubuntu. Despois de anos en macOS, o cambio foi máis natural do que esperaba. Todo o que necesito corre nativo, Docker vai coma un tiro sen capas de virtualización, e a liberdade de configurar cada recuncho do sistema sen que ninguén che poña límites agrádecese. Non é para todo o mundo, pero para desenvolvemento é difícil pedir máis.
Terminal
Ghostty como emulador con tmux para sesións persistentes. Múltiples paneis, un con logs de Docker, outro co servidor de desenvolvemento, outro para git. Todo visíbel dun ollo.
O shell é zsh con Oh My Zsh e un prompt mínimo. Nada de temas recargados con emojis—só o directorio actual, o branch de git e se o último comando foi ben ou mal.
Axentes de IA
Uso OpenClaw como sistema multi-axente. Teño axentes especializados por dominio: un para código, outro para infraestrutura, outro para tarefas persoais. Non é como chatear con ChatGPT—son axentes que executan, que acceden a ficheiros, que corren comandos.
Substitúen a saber programar? Non. Pero multiplican o que podes facer, especialmente cando estás aprendendo. É como ter un compañeiro de pair programming que nunca se cansa e que sabe máis ca ti de case todo.
O que non uso
Non uso Vim nin Neovim. Non teño nada en contra, pero a curva de aprendizaxe non compensa para o meu caso. Non uso Notion nin Obsidian para documentar código—un README ben escrito e comentarios claros abóndanme. Non uso monitores ultrawide—dúas pantallas normais e listo.
Ás veces o máis produtivo non é a ferramenta máis sofisticada. É a que xa coñeces e non che estorba.
Se queres saber máis sobre o NAS e os servizos que corren nel, mira o caso de estudo do Homelab.